Tō Mātou Moemoeā

TE PAE TAWHITI — TŌ MĀTOU WAWATA

He Whenua Rangatira – He Tohu Matatū o te Rangatiratanga

To Mātou Koromakinga

TE KAUPAPA — TA MĀTOU KOROMAKINGA

Titiro ki ngā Taumata o te Moana – Hei Whakaahua i te Kī Taurangi Mutunga Kore o Waitangi ki te Ao

Ō Mātou Tino Uara

Whakamanawa

Whakarite 

Manaakitanga 

Tika

Kaitiakitanga 

Whakarerekē 

Rangatiratanga 

Te whakatū i te Waitangi National Trust

I whakatūria te Waitangi National Trust e tētahi Ture Pāremata ki te whakahaere i te papawhenua. Nā tana pukapuka tarahiti, he mea tuhi i te 1932, i whakatakoto ngā whāinga mā te Poari Kaitiaki me te Papawhenua o Waitangi. Ka whai wāhi ki ēnei te whakatika me te whakarauora i te Wharenoho o mua tērā, i runga anō i tā Rore Bledisloe tono, i tapaina anō ko te Whare Tiriti.

Anei ngā mema o te Poari tuatahi:

• ko ngā kaitakoha, Rore me Reiri Bledisloe, he mema ā, mate noa
• Vernon Reed
• ko te Pirimia George Forbes
• Ko Alfred Ransom, ko te Minita e whakahaere ana i te Scenery Preservation Act
• Ko Tā Āpirana Ngata, te Minita Take Māori
• Ko Kenneth Williams, he mema no te whānau o te mihingare Williams
• ko Riri Maihi Kawiti e whakakanohi ana i ngā whānau o Hōne Heke, rātou ko Maihi Kawiti, ko Tāmati Wāka Nene, ko Pōmare
• ko te Kīngi Māori, Te Rata Mahuta
• ko Tā Robert Heaton Rhodes, e whakakanohi ana i ngā iwi o Te Waipounamu
• ko Tā Francis Dillon Bell, e whakakanohi ana i te whānau o Edward Gibbon Wakefield, te kaiwhakatū o te New Zealand Company
• ko Gordon Coates, he Pirimia o mua.

Tae noa mai ki tēnei rā ko ngā mema o te poari he kanohi o ngā tāngata kua whai hononga tika ki tēnei pae hītori. Kei te Kāwana Tianara o te wā te motika ki te kōwhiri kia noho hei Whakaruruhau o te Tarahiti.

‍ 

Hei kaitiaki kei te Waitangi National Trust Board te haepapa ki te:

‍ 

• Tautiaki i te papawhenua o te  Waitangi National Trust me ana taonga hei Tūrangawaewae mō ngā tāngata katoa o Aotearoa.
• Whakahaere i te whakawhanaketanga toitū o te whenua me ngā rawa o te Tarahiti mā te tautiakitanga, te whāomoomo me te whakahaere e tika ana
• Rauhī, tiaki me te whakaatu i ngā taonga e tiakina ana e te Tarahiti
• Whakanui i te māramatanga ki te Tiriti o Waitangi, tōna hira hei puka tūāpapa mō te whenua, me tōna pānga haere tonu ki tō tātou oranga ā-whenua
• Whakawhanake me te whakahāngai i ōna tikanga e pā ana ki te urunga me te whakamahinga o te pae i hainatia rā te Tiriti o Waitangi, o Te Whare Rūnanga, me te waka Ngātokimatawhaorua
• Whakarite kia tika te whakamahi i te papawhenua o te Waitangi National Trust hei whakanui i te hainatanga tuatahinga o te Tiriti

Te tīmatanga o te Papawhenua o te Tiriti Te Takoha a Bledisloe

Whai muri i te hainatanga o te Tiriti i te tau 1840 ko te whānau Puhipi ngā rangatira o te Whare Tiriti. He mea hoko atu te whare me te papawhenua huri rauna e Akinihi Puhipi i te 1882, i te tekau tau i muri i te matenga o tōna hoa rangatira. I ngā tau ka pahemo ka tauheke haere ngā rawa o te papawhenua, ko te mutunga iho ka noho hei whenua pāmu pāhekeheke noa o Aotearoa. Ko te āhua rā, i maumaharatia te hira o taua wāhi e te Māori anake. I te tau 1878 i tuku petihana ētahi tāngata nō ngā iwi o te takiwā ki te kāwanatanga tērā i tono kia whakatūria he whare rūnanga whakamaumahara, erangi i whakanau te Kāwanatanga.

I ngā tau tōmua o te rautau 20 ka kawea ake te mānuka takoto e Vernon Reed, te mema pāremata o te rohe, he rōia anō hoki, hei whakanui ake i tō ngā tāngata o Aotearoa whakamaioha i Waitangi hei pae hira mō te katoa o Aotearoa. I maha ngā whakahoe me ngā ketekete, erangi i te tau 1932 i te Kāwana Tianara me tōna hoa, i a  Rore me Reiri Bledisloe, e hararei ana i te Pēwhairangi, he mea aki rāua e Reed kia toro i Waitangi me te kite ko rāua anō i taua wā hītori nui. I ātahungia rāua e te pae, ā, i runga anō i tō rāua kaha whakapono me whakamaioha ngā tāngata o Aotearoa i tōna hira, ka hokona te i te Waitangi National Trust papawhenua e rāua.

I te 10 o Mei, whai miuri i tana toro, ka whakamōhiongia ā-reta te Pirimia George Forbes e Rore Bledislow: 'Tenei au, mō māua ko Tōna Tino Hōnore, e tāpae nei mōu ki te motu, te pae tino hītori nui o Aotearoa, ko "Waitangi", me ngā eka 1000, he wāhanga o te papawhenua katoa kua hokona mai i nā tata nei mō tēnei pūtake.'

I takoha ōkawatia a Waitangi e Rore Bledisloe ki te whenua i tētahi hui i taea rā e te mano tini i te 6 o Pēpuere 1934 – te Rā o Waitangi tuatahi, te rā ā-iwi o Aotearoa.

‍