Te Whare Rūnanga 

He mea marohi te whakaaro mō tētahi Whare Whakairo hei tā te Māori takoha ki ngā whakanuinga rautau mō te hainatanga o te Tiriti o Waitangi e Tau Henare, te Mema Māori mō te Tai Tokerau, rāua ko Tā Apirana Ngata, Te Minita mō ngā Take Māori. I tīmata ngā mahi whakairo i te hapori kāinga o Tau Henare, i Mōtatau i te tau 1934, i whakatuwheratia te whare i te 6 o Pepuere 1940 – 100 tau i muri i te hainatanga tuatahi o te Tiriti o Waitangi.

Ki te Māori, he tohu mana nui ngā wharenui, ā, ko te tikanga tapaina ai ki te ingoa o tētahi tupuna, me te whakatinana hoki i taua tupuna. Ka kitea tōna hanga hei tinana e whātoro mai ana, ā, e tohu ana te akitu o te tuanui o mua i te mātenga o taua tupuna. E tohu ana te tāhuhu i te tuaiwi, ko ngā maihi i mua ngā ringa, ā, ko ngā raparapa ngā matihao. Ko te poutokomanawa i roto te manawa, ko ngā heke ngā rara o te tupuna, ko roto o te whare ko te uma me te puku o taua tupuna.

E whai ana Te Whare Rūnanga i taua āhua tuku iho, engari kīhai te whare i tapaina ki te ingoa o tētahi tupuna kotahi. E tohu kē ana te whare i te kotahitanga o ngāi Māori puta noa i Aotearoa. E taunakitia ana tēnei nā te whakaurunga o ngā momo tāera whakairo nunui o ngā iwi puta noa i te whenua, me te aha ka noho he whakaaturanga tino ahurei o ngā toi Māori, he tauira anō hoki o te ao pāpori, ahurea hoki o te Māori.

E pōwhiringia ana ngā manuhiri ki roto i te whare rūnanga ia rā kia mātakitaki ai i reira i ā Waitangi mahi rēhia.