He Awheawhe Whakaako ā-Matihiko i Ngā Tātai Kōrero o Aotearoa - Te Whakarei Whakaakoranga me te Whakangako Akoranga
Ko tā tēnei awheawhe he kōmitimiti i te ako i Ngā Tātai Kōrero o Aotearoa me te Hangarau Matihiko mā te torotoro i ngā utauta matihiko e taea ai e ngā kaiako te whakahāngai ki ō rātou anō taiao ako. Ahakoa e whakaako ana koe mō Te Tiriti o Waitangi, mō te whai wāhi a Aotearoa i ngā Pakanga Nui o te Ao, mō ngā horopaki hītori o tō takiwā rānei, ka māmā te kōmitimiti noa i ngā huarahi mai i ēnei awheawhe ki roto i ngā mahere ako, mā reira e whakangako ai i ngā ritenga whakaako me te whakarei i ngā akoranga o ngā ākonga.
Te whakarei me te tautoko i ngā tātai kōrero o Aotearoa
Hei wāhanga o te awheawhe ka tūhurahura te kaiako me pēhea e taea ai e te hangarau matihiko te whakarei ake me te tautoko i ngā ihirangi o te marautanga o Ngā Tātai Kōrero o Aotearoa. Ka whakawana ngā utauta matihiko i te hītori, ka mutu, ka whakaahei i ngā ākonga ki te tōmene, te tūhono me te whai wāhi ki ngā wā o mua mā ngā ara tē taea te pohewa i mua.
E whakatairanga ana te whakamahi tōtika i te hangarau matihiko i te mahi tahi me te whakamana i tā ngā ākonga tino whai wāhi atu ki ā rātou akoranga. Mā ngā pūhara tuihono me ngā taupānga tauwhitiwhiti ka āhei ngā ākonga te mahi ngātahi i ngā kaupapa, te tātari i ngā puna mātāmua, me te hanga i ngā wae ihirangi matihiko tērā ka whakaatu i tō rātou māramatanga ki ngā tātai kōrero o Aotearoa.
Ngā wheako ako haumako
Ka aro ēnei awheawhe ki te whakapiki i ngā pūkenga o ngā kaiako, te āwhina anō hoki kia māia ake, kia tautōhito ake rātou ki te whakapuaki i ngā wheako ako matihiko haumako puta noa i te marautanga o Aotearoa. Ina taunga ngā kaiako ki te whānuitanga o ngā utauta matihiko, ina mōhio me pēhea te komokomo i ērā i runga i te tōtika ki roto i ā rātou hōtaka ako, ka mutu, ka āhei te whakahihiko i ngā whakatupuranga o āpōpō kia mahi hei kaihanga ihirangi matihiko, kaua e noho hei kiritaki noa iho mō aua ihirangi.
Kei a tātou hei kaiwhakaako te kawenga ki te whakareri i ā tātou akonga mō te ao o anamata e nui haere tonu ai te taha matihiko, e kaha ake ai hoki te tūhonohonotanga. Mā te whakawhānui i te hangarau matihiko ka whakaohooho pea tātou i te kaingākautanga o ngā ākonga ki te ako me te hoatu ki a rātou ngā pūkenga me te mōhiotanga kia āta whai wāhi ai ki ngā tātai kōrero o mua me te whakarite kia takatū rātou mō āpōpō.