Flagstaff

Te Pouhaki o Waitangi 

He mea koha te pouhaki tuatahi ki a Hēmi Puhipi e te rangatira o Ngāpuhi, e Hōne Heke Pōkai. I muri atu ka nukua ki Kororāreka (koia ko Russell) i rāwāhi o te kōkoru. I te tau 1934 i whakatūria he pouhaki e Te Taua Moana o Aotearoa, ka whakakapia i te 1947, ā, e noho tonu ana Te Taua Moana hei kaitaki i te pouhaki tae noa mai ki tēnei rā.

I hoatu kohaina te rākau mō te pouhaki e te Gisbourne Sheepfarmers’ Company Limited, te Kauri Timber Company Limited me Toitū Te Whenua. I te kitenga o te pirau haere o te maihi matua, ka whakakapia te pouhaki e Te Taua Moana o Aotearoa i te tau 1947. Nō te Ngahere Kāwanatanga o Puketī te kauri hei hanga i te pouhaki e 34 mita te teitei, ā, i hangaia ngā maihi hou i Te Papawhenua o Waitangi anō i raro i te tirotirohanga a Robert Coutts, ko tāna mahi i taua wā he whakatō rākau māori huri noa i te Papawhenua, Ko te Taua Moana te kaitiaki tonu o te pouhaki ā moroki noa nei, ā, kei Waitangi te Taua Moana i ia Rā o Waitangi.

Ngā haki

He mea kōwhiri te haki tuatahi o Aotearoa i tētahi huinga rangatira i Waitangi i te 20 o Maehe 1834, hei whakarite kia tautohua ngā kaipuke he mea hanga i Aotearoa, nō ngā tāngata hoki o Aotearoa, e ērā atu whenua o te ao. I tono te kainoho Piritene, a Hēmi Puhipi, i ngā rangatira Māori kia kōwhiri i tētahi o ngā hoahoa e toru mō te haki. E kapakapa mai ana tēnei haki, e mōhiotia ana ko Te Kara o Te Whakaminenga o Ngā Hapū o Niu Tireni, i te pou huapae ki te raki o te pouhaki. I whakaatu mai te whakaaetanga a Piritene ki taua haki e kitea ana te whenua nei puta noa i te ao hei whenua motuhake, ka mutu, ka wātea ngā kaipuke o Aotearoa te whakatere me te tauhokohoko ki tāwāhi me te kore whakapae o ngā mahi kaitiora.

E kawea ana e te pouhaki e Kara o Te Whakaminenga o Ngā Hapū o Niu Tireni ki te raki, te Tiaki o Ingarangi  ki te tonga, me te haki o Aotearoa i waenganui. I ngā wā kei Waitangi te Kāwana-Tianara, e kapakapa ana tana haki i runga ake i te haki o Aotearoa.